Promoziozko binakako txapelketako finalerako txartela eskuratu zuten Peña II.ak eta Erasunek bart; Medranon (Errioxa) jokatu zuten partida. Norgehiagoka hasi eta berehala aurretik jarri zen tolosaldeko bikotea, eta horrela eutsi zioten amaierara arte.
Bikain aritu ziren biak ala biak, Jon Ander Peñak hamabi tanto egitea lortu zuen, eta Jon Erasunek, berriz, bi besterik ez zituen galdu. Partidako errentarik handiena bukaeran lortu zuten: hamar tantoko aldearekin atera zuen azken sakea aurrelari tolosarrak (21 eta 11).
Garaipen horrekin batera, finala jokatzeko txartela eskuratu zuten. Txapelketako azken partida abuztuaren 1ean izango da, eta Agirre eta Eskiroz izango dituzte aurrez aurre.