Eguzkia berriro bueltan da

Eguraldi eguzkitsua bueltan izango dugu gaurkoan. Goizean hego haizeak joko du eta horrekin tenperaturek gora egingo dute atzokoarekin alderatuz.

Eguraldia dezentez epelagoa izango dugu eguerdiko erdiko orduetan, 20-22 gradutan errendituko dira tenperatura maximoak. Eguraldi atsegina izango dugu, beraz, tenperatura aldetik. Zeruan ere aitzakia gutxi izango dugu egunaren lehendabiziko zatian, apenas ikusiko dugu hodeirik, gehienez jota goi hodeiren bat edo beste ikusiko dugu. Ondoren eguerditik aurrera haizeak ipar ukitu bat hartuko du eta horrekin hodei baxuak ugaritu egingo dira baina ez dute bestelako ondoriorik ekarriko, eta gaurkoan eguraldi eguzkitsuaz gozatzeko aukera izango da. 

Biharkoan berriz eguraldia zertxobait nahastu egingo zaigu. Frontexka batek hodeitza utziko digu eta goiz partean gainera euri pixka bat utziko digu, gutxi baina zer edo zer euri txikitan botako du. Nahikoa eguraldia aldrebesteko. Arratsaldean eguraldia lasaitzen hasiko zaigu eta eguna bukatzerako ostartetxo batzuk ere irekiko zaizkigu. Haizeak mendebaldetik joko du eta tenperaturak 20-22 gradutan mugituko zaizkigu. 

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!