Porrota errekonozitzen du Pello Atxukarrok, eta bere ustez, PPren esparru politikoan eman den zatiketak zerikusia izan du botoen galeran. Bestetik, kanpainan "tentsio handia" egon dela azaldu du, eta PPri eskuin muturrera joan izana egotzi diotela.
Pedro Sanchezek gobernua osatzeko egingo duen hautuari dagokionez, aukera desberdinak daudela, eta ez duela argi ikusten zer egingo duen dio. "Badirudi Ciudadanosek ez duela lagunduko gobernua osatzen, eta PSOEren jarraitzaileek aukera hori ere ez dute gogoko, beraz, ez dakit zer egingo duen".
Udal hauteskundeei begira, lanean jarraituko dutela esan du: "Atzoko hauteskundeetako berberak gara, eta politikan jardungo dugu politika egitea interesatzen zaigulako. Orain herriko politikari xumeei tokatzen zaigu herriaren aurrean agertzea, herriak zer behar duen eta herritarrei zer komeni zaien ikustea, eta horretan jarraituko dugu".
