Tolosaldean 214 dira maiatzaren 26ko udal hauteskundeetan hautatuko diren zinegotziak. 17 eserleku erabakiko dira Tolosan, 13 Amasa-Villabonan eta hamaikana Zizurkilen, Ibarran eta Anoetan. Azken herri horretan, bederatzi zinegotzi hautatzen ziren orain arte, baina 2.000 biztanleko kopurua gaindituta, bi zinegotzi gehiago izango dituzte orain.
Bederatzirekin jarraituko dute Alegia, Asteasu, Berastegi eta Irurako udaletxeetan eta bosna izango dituzte, berriz, Elduain, Gaztelu, Baliarrain, Orendain, Orexan eta Belauntzan. Hain justu, biztanle kopurua 101 eta 250 bitartekoa den udalerrietan, bost zinegotziak zerrenda irekien bidez hautatuko dira: boto-paper bakarra egongo da eta bertan alderdi desberdinetako hautagaiak agertuko dira. Hautesleak lau hautagai markatu beharko ditu, nahiz eta alderdi desberdinetakoak izan. Lehen aldiz erabiliko dute sistema hori Belauntzan. Tolosaldeko gainerako 13 udalerritan zazpina zinegotzi erabakiko dira.
