GAUR SAILKAPENA NOLA DAGOEN
1. Elezkano II-Rezusta, 13 jokatu, 9 puntu
2. Irribarria-Zabaleta, 13 jokatu, 8 puntu
3. Olaizola II-Albisu, 13 jokatu, 8 puntu
4. Artola-Mariezkurrena II, 12 jokatu, 7 puntu
5. Altuna III-Martija, 12 jokatu, 6 puntu
6. Ezkurdia-Galartza, 13 jokatu, 6 puntu
Falta dena
Azken aurreko jardunaldia hasi aurretik, Jokin Altuna eta Iñaki Artola biak batera finalerdietan egoteko probabilitatea %17koa zen. Jardunaldia hasi orduko hutsean geratu dira, ordea, probabilitate horiek: bietako bat finalerdietan egongo da, baina bestea, bai edo bai, kalera joango da. Ezkurdia-Galartza bikotea ere finalerdietatik kanpo geratu da, nahiz eta euren partida irabazi 22-14 Bengoetxea VI-Imazi.
Ezkurdia-Galartza, kalera
Jardunaldi baten faltan sei punturekin daude. Hurrengo asteburuan irabaziz gero, Artola-Mariezkurrenari 7. puntua lortuko lukete. Egun Artola-Mariezkurrena II.ak duten kopuru bera, bi partidaren faltan. Azken hauek bi partida horiek galduta 7 punturekin geratuko lirateke, baina horrek esan nahiko luke, bihar Altuna III-Martijaren aurka galdu egingo luketela eta amezketarrak eta nafarrak 7 puntu gutxienez izango lituzketela. Ondorioz, hiru bikote horien arteko berdinketa emango balitz, Ezkurdia-Galartza kalean lirateke.
Araudiaren arabera, berdinketa batean, bikoteen arteko partidetako puntuak kontatu behar dira. Altuna III-Martijak 3; Artola-Mariezkurrena II.ak 2; Ezkurdia-Galartzak 1.
Artolak bihar irabazten baldin badu, finalerdietara
Artola-Mariezkurrena II.ak bihar Tolosan irabazten baldin badute, Altuna III-Martijaren aurka, finalerdietan egongo dira; amezketarra, ondorioz, kanpoan. Aldi berean, Artolak bihar galdu eta azken jardunaldian, alegiarrak irabazi, baina Altuna III.ak galdu, Iñaki Artola-Mariezkurrena II.ak aurrera egingo lukete.
Beotibarren Altuna III-Martija suertatzen baldin badira irabazle, lehen ligaxka honen amaieran gutxienez bi bikote berdindurik geratuko dira; 7 edo 8 punturekin. Horien arteko sailkapena egin beharko litzateke.
Amaieran berdinketak suertatuko balira nortzuk aurrera?
7 puntukoen artean berdinketa
Hiru bikoteren artean gerta daiteke hori: Altuna III-Martija (geratzen zaizkien bi partidak irabazita); Artola-Mariezkurrena II.a (geratzen zaizkien bi partidak galduta) eta Ezkurdia-Galartza (azken partida irabazita). Kasu horretan, Jokin Altuna eta Julen Martija finalerdietan izango ziren.
8 puntukoen artean berdinketa
Gaur 8 punturekin bi bikote daude, azken jardunaldiaren faltan: Olaizola II-Albisu eta Irribarria-Zabaleta. Baina azken jardunaldi hori elkarren aurka jokatzen dutenez, batek 9rekin amaituko du lehen ligaxka hau. Bestea, esan beharrik ez dago, 8rekin geratuko da.
Altuna III-Martijak falta zaizkien bi partidak irabazi behar dituzte 8 puntura iristeko. Tartean, biharkoa, Artola-Mariezkurrena II.aren aurka. Horrela izanez gero, alegiarrak eta bere atzelariak azkena irabazi beharko lukete 8ra iristeko.
Laugarren postua 8 puntu dituzten bikoteen artean erabaki beharko balitz, bi aukera hauek egongo lirateke:
- Irribarria-Zabaleta, Altuna III-Martija eta Artola-Mariezkurrena II.a. Kasu honetan, hiruen arteko sailkapena hau izango litzateke: 1. Altuna III-Martija (3 puntu); 2. Irribarria-Zabaleta (2 puntu) eta Artola-Mariezkurrena II (puntu bat). Azken hauek, beraz, finalerdietatik kanpo.
- Olaizola II-Zabaleta, Altuna III-Martija eta Artola-Mariezkurrena II.a. Kasu honetan, hiruen arteko sailkapena hau izango litzateke: 1. Olaizola II-Albisu (3 puntu); 2. Artola-Mariezkurrena II (2 puntu) eta Altuna III-Martija (puntu bat). Azken hauek, beraz, finalerdietatik kanpo.
Ondorioz, beste gauza bat argi geratzen dena zera da: bihar Tolosako partidaren tanto kopuruak ez diola axolarik, puntua izango da erabakigarria.