Eskualdeko bertsozaleentzat ezinbesteko hitzordua da Ataria Bertso Jaialdia, urtero jendez betetzen baita Leidor antzokia. Aurtengo bertso-festak badu data eta kartela: urtarrilaren 19an ospatuko da eta honako seikotea izango da oholtzan: Maialen Lujanbio, Andoni Egaña, Amets Arzallus, Oihana Iguaran, Nerea Ibarzabal eta Haritz Mujika. Gai-jartzaile lanetan, berriz, Amaia Agirre ariko da.
Atarikideek astelehenetik aurrera erosi ahal izango dituzte sarrerak, Tolosaldeko Atariaren egoitzan bertan. Astelehenetik ostegunera, 12:00etatik 19:00etara etorri ahal izango da. Abenduaren 21ean eta 27an, berriz, 09:00etatik 13:00etara.
Atarikide bakoitzak gehienez bi sarrera eskuratu ahal izango ditu, bakoitza 10 euroren truke. Atarikide ez direnentzat, berriz, urtarrilean jarriko da martxan salmenta, eta sarrerek 12 euroko salneurria izango dute.
