Urriaren amaieran Euskal Herriko Halterofilia Txapelketak jokatu ziren Gasteizen, 15 eta 17 urtez azpikoen mailan. Danok Danena Halterofilia Taldeko pultsulariak bertan izan ziren. Gazteenen artean Jon Kepa Kortajarena izan zen txapelduna. Lehiakide, gaur egun Espainiako txapelduna den Bruno Soto bizkaitarra izan zuen. Borroka latza izan zuten bien artean lehen postua lortzeko eta zizurkildarrak bere egunik onena ez bazuen izan ere, puntu bakar batengatik bizkaitarrari irabaztea lortu zuen.
17 urtez azpikoetan, Xabier Amonarriz bigarren geratu zen. Hemen ere lehia ikusgarria egon zen. Kasu honetan, Amonarrizen aurkaria Euskal Herriko txapelduna zen, nazio arte mailako pultsularia. Borroka bikain batean Danok Danenako pultsulariak bere marka 7 kilotan hobetzea lortu zuen. Ez zen nahikoa izan, puntu bakarragatik txapela galdu baitzuen. Bi pultsulari hauek, azaroaren 17an Cacabelosen (Leon) ospatuko den Espainiako Kopan parte hartuko dute.
Villabona-Zizurkilgo halterofilia taldetik biak zoriondu dituzte, horrela jarrai dezaten animatuz: «Lanean gogor ari zarete eta ea Espainiakoan ere zortea duzuen!».