Europa osoan ospatzen da Mugikortasun Astea eta Aiztondoko udalek bat egin dute ekimenarekin. Gaur goizean antolatu dituzten ekimenez gain, Mugikortasun Festa egingo dute datorren ostiralean, Villabona eta Zizurkil banatzen dituzten Zubimusu zubiaren bueltan.
Gaur goizean, herritarren mugikortasunarekin zerikusia duten materialak utzi dituzte Villabonako Berdura plazan. Bizikletak, patinak, haurrentzako orgatxoak, kaskoak eta beste material asko egon da salgai. Zizurkilen berriz, Danena elkartekoek dinamizatuta ginkana egin dute Joxe Arregi plazan eta horrela nahi izan duenak, bizikleta konpontzeko aholkuak jaso ahal izan ditu.
Bi urteok etenaren ostean berreskuratu dituzte ekimen hauek Aiztondo bailaran.