Igandean, Zarauzko torneoko finalean garaipena lortu eta bi egunetara, partida bera errepikatuko da, gaur arratsaldean, Bilboko Bizkaia pilotalekuan. Hain zuzen ere, Artolak eta Albisuk, Irribarria eta Rezustaren aurka aritu beharko dute. Bizkaia torneoko finala jokatuko dute, eta beraz, txapelketa luze honen amaieran, talde onena zein den erabakiko da.
Aste honetan, Aste Nagusia ospatzen ari dira Bizkaiko hiriburuan. Hortaz, festa giroan murgilduta dagoen Bilbon arituko dira nor baino nor momentuko pilotari onenetakoak. Txapelketan zehar, sei talde desberdin izan dira, lehen nahiz bigarren mailako pilotariekin osatutakoak, eta bakoitzak, Bizkaiko mendi baten izena eraman du: Oiz, Anboto, Kolitza, Ganekogorta, Sollube eta Gorbeia. Probintziako bost herritan jokatu diren kanporaketen bitartez, sei taldeetatik bik bakarrik lortu dute gaurko finalera iristea.
Anboto eta Kolitza dira finalera heldu diren bi taldeak. Anboto, Asegarceko pilotariek osatzen dute, eta Kolitza, berriz, Aspekoek. Binakakoa, ordea, ez da jaialdiko partida bakarra izango. Lehena, lau t'erdiaren barruan jokatuko dute, Victorrek (Anboto) eta Ezkurdiak (Kolitza). Ondoren, Artola kantxaratuko da, gainerako hiru pilotariekin batera. Azkenik, Erasun zizurkildarrak (Anboto) jokatuko du buruz buruko partida, Elordiren (Kolitza) aurka. Berez, Dario zen Asperen izenean jokatzekoa, baina min hartuta dagoenez, aurrelari mallabitarrak ordezkatuko du errioxarra.
Alegiako aurrelariak, hortaz, berrogeita zortzi orduren buruan, udako bigarren txapelketa irabazteko aukera izango du. Hala ere, argi utzi nahi izan zuen igandean oso partida desberdina espero beharko dutela: "Ez zait iruditzen gaurko partidaren antzekoa aterako zaigunik. Asko kostatuko zaigu errepikatzea".
Bizkaia Torneoaren finala: Kolitza-Anboto.
Bizkaia pilotalekua (18:00).
Lau t'erdian:
Ezkurdia
Victor
Binaka:
Irribarria - Rezusta
Artola - Albisu
Buruz buru:
Elordi
Erasun