Jokin Etxeberria eta Andoni Goikoetxea, Euskadiko txapelaren bila

Mikel Iraola 2018ko abu. 4a, 16:15
Euskadiko Txapelketan arituko diren lau segalariak, Gipuzkoako txapelketa amaitu berritan

Asteasuko Sarobe baserriko larreetan jokatuko da, bihar, 12:00etatik aurrera, Euskadiko Sega Txapelketa. Jokin Etxeberria amasarra eta Andoni Goikoetxea gazteluarra dira parte hartzaileen artean.

Lau segalari arituko dira bihar nor baino nor gehiago Asteasun. Horietako hiruk badakite zer den Euskadiko txapela janztea.

Andoni Goikoetxea gazteluarrak 2006. urtean irabazi zuen txapelketa. Joan den urtean, Julen Gabirondo urnietarra izan zen garaile, 2015ean bezalaxe. Parte hartzaileen artean txapela gehien eskuratu dituen segalaria, berriz, Igor Esnaola legorretarra da: 2016, 2014, 2013. Azken txapelketa izango da Esnaolarentzat.

Adituen arabera, ordea, Jokin Etxeberria da txapeldun izateko faborito nagusia. Izan ere, eta orain arte Euskadiko txapelketarik lortu ez duen arren, Gipuzkoako txapelketa irabaztetik dator amasarra. Uztailean jokatu zen, Asteasuko Bulano baserriko larreetan.

Azken urteotan egin den moduan, Gipuzkoako txapelketa jokatu duten lau segalariak arituko dira Euskadikoan. Orduan, Etxeberriak erakustaldia eman zuen, 2.811 kilo belar ebakiz. Gabirondo izan zen bigarren, 2.752 kilo moztuta. Hirugarren postua Igor Esnaolarentzat izan zen, 2.623 kilorekin, eta laugarren postuan amaitu zuen Andoni Goikoetxeak, 2.621 kilo moztuta.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!