Adin txikiko neska bati sexu erasoa egitea leporatuta 27 urtezko gizonezko bat atxilotu zuen Ertzaintzak larunbat goizean Tolosan, eta epailearen aurretik pasa ostean, espetxeratu egin dute.
Tolosako eta Ibarrako udalek adierazpen bateratua argitaratu dute, eta "irmoki gaitzetsi" dute "gertatutako sexu erasoa". Bide batez, "sexu erasoa jasan duen emakumeari zuzeneko elkartasuna eta babesa" adierazi diote bi udalek, eta "indarkeria mota honi aurre egiteko" dituzten zerbitzuak eta tresnak bere eskura jarri dituzte.
Bi udalek, herrietako mugimendu feministekin eta emakumeen elkarteekin bat eginda, 15 minutuko elkarretaratzea deitu dute bihar arratsalderako. Elkarretaratzea 19:00etan izango da, Tolosako Plaza Zaharrean, Indarkeria sexistarik gabeko herri baten alde lelopean, eta herritarrei bertaratzeko gonbita egin diete.
Duela hilabete antzeko kasu bat izan zen Tolosan. Apirilaren 19an 76 urteko gizonezko bat espetxeratu zuten, Tolosako etxebizitza batean emakume bat bortxatu zuela leporatuta. Salaketa egun batzuk pasa eta gero jarri zuen biktimak, eta kasua ezagutu eta ordu gutxira ehunka herritar batu ziren Plaza Zaharrean sexu erasoa gaitzesteko, Tolosako Udalak, Tolosako Emakume Taldeak eta Mugimendu Feministak egindako deiari erantzunez.