Goizean 09:00etan hasi da festa Euskal Herri plazan. Pablo Rivero argentinarra izan da goiztiarrena, eguerdian pintxoetan dastatzera emandako arkumeak prestatu baititu parrilan. Rosarion jaioa, duela 17 urtetik Parrilla Don Julio jatetxeko arduraduna da.
Gaur gauean afaritan emango dituzten txerrikiak prestatzen aritu dira, berriz, Jefferson Rueda brasildarra eta Renzo Garibaldi peruarra. Biek ere, haragi-erretze teknika ezberdinak erabili dituzte eta iluntzean, Euskal Herri plazan prestatutako jantokian emango dute dastatzera prestatu duten jakia.
Ikusmen handiena, ordea, Dante Ferrero mexikarrak piztu du. Patagonian sortu arren, Monterrey du bizileku eta sua, txingarrak eta egur-labea ezin hobeto menderatzen ditu. Su artean hazi eta egur sukaldeetan aritu da eta behiaren chef-a deitzen diote. Txahala jarri du osorik kozinatzen gaur eta 24 orduz edukiko du sutan, bihar eguerdian dastatzera emateko.
Zerkausian, berriz, Haragi ikasgela jarduera jarri dute martxan. Jantoki nagusiari atxikitako ikasgela balio-aniztuna prestatu dute. Gaur gonbidatu izan dira Jose Gordon eta Juan Antonio Zaldua, besteak beste. Tolosako Txuletaren Festaren bidetik iritsi da egitasmoa, eta hiru erakunderen artean antolatuko dute: Tolosako Udala, Basque Culinary Center eta Eusko Jaurlaritzako HAZI.
Eguerdian 200 lagun inguru bildu dira bazkari herrikoian Zerkausian prestatutako jantokian. Tolosako erretegiak, parrilaren lau tenpluak, aritu dira gonbidatuekin batera txuletak prestatzen: Botarri, Burruntzi, Casa Julian eta Casa Nicolas.
Iluntzean omenaldi ofiziala egingo zaie aipatutako Tolosako erretegiei, haien ibilbide eta lanarengatik errekonozimendu gisa. 19:00etan izango da Topicen.
