Alhaurin el Granden (Malaga) jokatu den Trail Cara los Tajos mendi lasterketa irabazi du Ane Iturria tolosar gazteak. Alpino Uzturre elkarteko lasterkariak 1:08:16ko denboran amaitu zuen lasterketa; Sara Aparicio eta Laia Mateu bigarren eta hirugarren izan ziren.
Hasieratik hartu zuen lasterketa burua Iturriak, eta ia bakarrik egin zuen lasterketa osoa. "Lehen kilometroetan hiru neska joan gara, baina gero aurrera egin dut", aitortu zuen helmugako marra pasa bezain pronto. "Asko disfrutatu dut, ibilbidea gustatu zait".
Espainiako Koparako lehen proba puntuagarria izan da Malagakoa. Beste lau lasterketaz osaturik dago Kopako aurtengo egutegia, horietako bat, Gipuzkoan jokatuko da. Hurrengo jardunaldia apirilaren 15ean jokatuko da Caceresen, Garganta de los Infiernos lasterketarekin. Maiatzaren 6an Tarragonan jokatuko da hirugarren jardunaldia: Panxampla mendi lasterketa. Laugarren proba Zumaian izango da, Zumaia Flysch Trail ezaguna, San Joan egunean, ekainaren 24an. Azken lasterketa abuztuaren 5ean jokatuko da Castellon.
Bideoan, Iturria helmugan sartzen