EAEko unibertsitatez besteko hezkuntza publiko irakasleak deitu dituzte grebara, bigarren egunez, ELA, LAB eta Steilas sindikatuek, Eusko Jaurlaritzari negoziazioa eskatzeko. Horrez gain, ELAk eta Steilasek heziketa berezi, haur eskola eta Hezkuntza Sailaren menpeko sukaldaritza eta garbiketa arloko langileak ere deitu dituzte.
Sindikatuek emandako lehen datuen arabera, jarraipen zabala izan du deialdiak. ELA eta Steilasen arabera, atzoko egunaren paretsua izan da jarraipena: irakaskuntzan %75, heziketa berezian %60, haurreskoletan %30 eta sukalde eta garbiketako langileen artean %65. LABen esanetan, aldiz, %70ekoa izan da jarraipena.
Eusko Jaurlaritzako Hezkuntza sailaren datuak, berriz, sindikatuek emandakoak baino askoz ere baxuagoak dira. Bigarren egunean, grebarekin bat egin duen jende kopurua altuagoa izan da gobernuaren arabera: %42,9 irakasleen artean, %24,5 heziketa berezian, 17,1 garbiketa eta jangelan eta %15,6 haurreskoletan.
Eguerdian, langile ugari irten dira kalera, Donostian, Bilbon eta Gastezen. Manifestazio jendetsuak egin dituzte hiru hiriburuetan, soldaten igoera, langile kopurua handitzea, egonkortasuna indartzea, bajak lehen egunetik ordezkatzea, gelako ikasle kopurua jeistea eta Lomce legea ez ezartzeko eskatuz. Halaber, hori guztia aztertuko duen "negoziazio mahaia" dei dezala galdegin diote sindikatuek Jaurlaritzari.