Mundarro, Urnieta eta Behar Zana irabazi dute Trinketeko Gipuzkoako txapela, gizonezkoen eskuz binakako mailan. Larunbatean jokatu zituzten finalak, Irurako Ametsa trinketan.
Mundarroko Lizeaga eta Mujika pilotariek jantzi zituzten kadete mailako txapela, Oiarpeko Aranburu eta Zalakaini 40-26 irabazi ostean.
Urnietak jubenil mailako nahiz nagusien lehen mailako txapelketa irabazi zuen, bietan eskualdeko talde bat garaituz. Jubenilen kasuan, Arizmendi eta Aldunberrik Tolosa-Aurrerako Zalakain eta Auzmendi hartu zituzten mendean, 40-29. Nagusien mailan, berriz, Behar Zanako Irisarrik eta Gurutzealdek ezin izan zuten Loitegi eta Esnaolaren aurka, 40-10.
Nagusien bigarren mailakoan ekarri dute txapela eskualdera. Behar Zanako Irisarri eta Maizek 40-25 irabazi zieten Hernaniko Pagola eta Arizmendiri.
Emakumezkoen paleta argentinarreko lehia besterik ez da geratzen Trinketeko Gipuzkoako Txapelketa amaitzeko. Apirilaren 15ean hasiko dira jokatzen, eta maiatza erdialdean izango dira finalak.
