Erabakita geratu dira Laboral Kutxa Emakume Master Cup txapelketako finalaurrekoak, eta lehen mailan aurrera egin duten lau bikoteen artean, eskualdeko pilotariek osatutako bikote bat dago.
Maider Mendizabal anoetarrak eta Miren Larrarte bidaniarrak aise irabazi zuten final-laurdenetako norgehiagoka, 18-8, Nagore Bilbao eta Arrate Bergararen aurka, eta igandean finalaurrekoa jokatuko dute. Oñatin izango da partida, 11:30etik aurrera, eta Olatz Arrizabalaga gernikarra eta Leire Etxaniz etxabarriarra izango dituzte aurkari.
Beste finalaurrekoa Amaia Araiztegi-Maddi Mendizabal eta Patri Espinar-Eneritz Arrieta bikoteek jokatuko dute. Promozio mailan, berriz, Alaitz Badiola-Oihana Orbegozo eta Maddi Unanue-Naroa Agirre arituko dira nor baino nor gehiago lehen finalaurrekoan. Bestean, Amaia Vicario-Ainhoa Urien eta Nagore Aramendi-Oihana Unanue arituko dira.