Nazio mailako txapelketaren IV. edizioa finalaren atarian da. Irurtzunek lortu zuen joan den igandean lehen txartela. Bigarrena, igande honetan erabakiko da.
Zer gertatuko den asmatzea oso zaila dago, bi elkarteetako pilotariek maila handia erakutsi baitute txapelketan zehar. Kantxara aterako diren pilotariak nortzuk izango diren jakitea ere ez da erraza, aukera desberdinak baitituzte elkarteetako arduradunek.
Lehen partidan, lau t ́erdikoan, Zazpi Iturritik Zubiriak jokatzea espero da. Buruzgainetik, berriz, Astiz izan daiteke aukeratua. Partida gogorra eta lehiatua espero da. Zubiriak tantoa azkar eta erraz bukatzeko gaitasuna dauka, eta Astizek fisikoa eta kolpea.
Bigarren partida frontoi osoan izango da, banaka. Eskualdeko ordezkaria Ioritz Egiguren izan daiteke. Aurrean Otxandorena izango luke tolosarrak. Modalitate honetan bi espezialista dira. Otxandorenaren pilotakadak ezagunak dira pilotazaleen artean. Egiguren edozertarako gai den pilotaria da, eta ondorioz, partida izugarri gogorra izango da.
Binakako partidan erabaki daiteke kanporaketa. Peru Labaka-Aizpuru izan daiteke Zazpi Iturriko bikotea; Iriarte-Sarasa Buruzgainena. Afizionatu mailan aski ezagunak dira lau pilotariak, eta klase handiko partida izango litzateke; zer esan finalerako txartela jokoan baldin bada.
Txapelketaren antolatzaileek pilotazaleak gonbidatu dituzte igandean Tolosako Beotibar pilotalekura.