Eguraldi motel xamarra izango dugu gaur. Fronte ahul batek hodeitza handia utziko digu eta tarteka, baita ere, euri pixka bat. Botatzen duena euri txiki edo xirimiri moduan botako du. Haizea ipar-mendebaldetik sartuko zaigu eta tenperaturak freskoak izango dira. Maximoak ez dira 10-11 ⁰C-tatik pasako.
Bihar eguraldiak altxatzera egingo du. Antizikloiak babesa eskaini eta eguraldi polita izango dugu. Zeruan hodei batzuk ikusiko ditugu, baina inolako ondoriorik ekarri gabe eta horren ondorioz egun osoan ateri izango da. Haizea ekialde, ipar-ekialdetik sartuko zaigu eta tenperaturek zertxobait irabaziko dute. Maximak 11-12 ⁰C-tan geratuko dira.
Etzi, igandean, eguraldi benetan atsegina espero da. Batetik, hego-haizea bueltan izango da eta haren eraginez tenperaturak nabarmen igoko dira, eguneko erdiko orduetan 14-15 ⁰C epel harrapatzeko, eta bestetik, zeruan nahiz goi-mailako hodeiren bat ikusiko dugun, eguzkia jaun eta jabe izango da eta eguraldi ederraz gozatzeko aukera izango dugu.
Astelehenean, eguraldi eguzkitsu eta epelak jarraipena izango du. Hego-haizeak berriz ere tenperatura epelak ekarriko dizkigu, non maximoak berriz ere 14-15 ⁰C-tan geratuko diren eta zeruan ere hodei gutxi, nahiz eta, azken orduetan mendebaldetik hodei batzuk sartuko diren.
Joerari dagokionez, asteartetik aurrera eguraldi euritsu, haizetsu eta epelak datozela ematen du.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!