Datorren larunbatean, urriak 21, XVII. Hernialdeko Rolleski Igoera antolatuko du Alpino Uzturre elkarteak. 16:00etan hasiko da proba, eta hiru modalitate bilduko ditu hitzorduak.
Batetik, skating estiloan ariko direnak, 16:00etan irtengo dira, Anoetako Sortalde kaletik. Bost minutura, berriz, estilo klasikoan ariko diren kirolariak irtengo dira. Azkenik, Tolosako eta Anoetako errepideak batzen diren puntuan, gaztetxoenak irtengo dira 16:10ean.
Guztiek ere Hernialdeko plazan izango dute helmuga eta, aurreko urteetako joerari eutsiz, Alpinoko antolatzaileek 80 parte hartzaile inguru espero dituzte; parte hartzaile gipuzkoar eta nafarren gain, Espainiako parte hartzaileak ere espero dituzte.
Aipatzekoa da, Hernialdera igoera Rolleski ligako hitzorduetako bat dela, beste zazpi probarekin batera: Arrate-Eibar, Erlaitz-Irun, Urgull-Donostia, Cendea de Galar eta Beorburu- Artikutza dira gainerakoak.