Sexualitatearen inguruan ditugun kezkak, bizipenak edota sentimenduak norbere barrurako, etxe barrurako edo esparru mugatu baterako uzten ditugu. Gizartea irekitzen doan heinean, ordea, geroz eta gehiago elkarbanatzen ditugu sexuarekin ditugun esperientziak, baina, beti ere, mugak jartzen dizkiogu gure buruari oraindik.
Bada, muga horiek albo batera utzi, eta sexuaz era naturalean hitz egiteko txokoa zabalduko ATARIA IRRATIA-K denboraldi berrian. Mingaina txulora izenburupean, sexuarekin loturiko denetariko gaiekin solasaldia egingo da hamabostean behin, Jon Imanol Etxabe sexologoak aditu lanak egingo dituelarik.
Entzuleen kezkak, bizipenak, zalantzak ere lekua izango dute saio berrian. Horiek helarazteko bidea whatsappa izango da. 687 41 00 33 zenbakira bidali ahalko dira era guztietako ekarpenak, eta gure adituak erantzungo ditu. Halaber, kalera ere aterako gara, eta jorratuko dugun gaiaz herritarrek duten iritzia entzungo dugu.
Estreinaldia, datorren astean
Ostiral gauak hartuko ditu Mingaina txulora saio berriak. 21:00etan hasiko da saioa, eta urriaren 13an izango da estreinakoa. Errepikapenaz hurrengo asteartean ordu berean gozatzeko aukera izango da, edota ataria.eus-en noiznahi entzun ahalko dugu.
Gure bizitzan nahiz gure egunerokoan duen garrantzia kontuan hartuta ez omen dugu sexuaz eta sexualitateaz behar adina hitz egiten. Ausardia faltagatik, lotsagatik, tradizioz era irekian solasteko gaia izan ez delako...
Erlazionatuak
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!