ataria.eus

Zizurkil eta Tolosa ere herriartekoa jokatzen hasiko dira

  kirola  Tolosa  Zizurkil

Adunak, Altzok eta Asteasuk lehen kanporaketa gainditzea lortu dute; Bidania-Goiatzek agur esan dio txapelketari.

Zizurkil eta Tolosa ere herriartekoa jokatzen hasiko dira
Zizurkilek herriartekoan aurkeztuko duen taldea. ATARIA | Ikusi handiago | Argazki originala

Tolosa eta Zizurkil Gipuzkoako Herriarteko Txapelketa jokatzen hasiko dira asteburuan, final zortzirenetan. Aduna, Asteasu eta Altzo aurreko kanporaketa gainditu ondoren iritsi dira maila horretara. Bidania-Goiatz, aldiz, final-hamaseirenetan kaleratua izan zen, hain zuzen ere, Altzoren aurka 4-2 galdu ondoren. Final-zortzirenetan, altzotarrek berriro eskualdeko herri baten aurka jokatu beharko dute: Zizurkil. Joaneko partidak larunbatean izango dira, Altzon, 11:30ean hasita.

Adunak Errenteria utzi zuen kalean estu eta larri lehen kanporaketan. Joanekoa 2-1 irabazi ondoren, itzulerakoa 2-1 galdu zuten. Garaipenei begiratuta, beraz, bi taldeak hiruna geratu ziren. Eskualdekoek, ordea, tanto gehiago lortu zituztenez, eurek egin dute aurrera. Final-zortzirenetan Oiartzunen aurka jokatuko dute. Lehen partidak etxean izango dira, ostiralean, 19:30ean.

Asteasuk Orio utzi du kanpoan final-zortzirenetan. Orain, aurkari, Azkoitia izango dute. Joanekoak etxean jokatuko dituzte, ostiralean, 20:00etan. Tolosak, bere aldetik, Azpeitiaren aurka jokatuko du. Hasiera batean etxean jokatzeak baldin baziren ere, lehen jardunaldia Azpeitian izango da, ostiralean, 22:00etan.

ZIZURKILDARREN AURKEZPENA

Gipuzkoako 50. herriartekoan esku pilota modalitatean Zizurkil herria ordezkatuko duen taldea buru-belarri dabil entrenamenduetan. Bigarren fasean hasiko da taldea, iazko emaitza onari esker. «Ez da batere erraza Zizurkil bezalako herri txiki batek herriarteko txapelketan parte hartzea, horregatik dagokion garrantzia ematea oso positiboa da herriarentzat berarentzat ere», azaldu dute taldetik.

Kadeteetan, maila oso ona ematen ari den Xabi Lasa izango da aurrelari titularra eta bere bizkartzain Enaitz Etxeberria ariko da. Ordezko gisa, infantil mailan dagoen Ander Perurena egongo da.

Jubenil mailan taldeak ez du ordezkorik izango. Horregatik minik ez hartzea oso garrantzitsua izango da taldeak bere sendotasuna izan dezan. Aurretik Julen Alberdik jokatuko du. Aurrelari bizia, defentsa handikoa, eta artista. Atzetik Mikel Arrate izango du, urteak pasa ahala sendotasuna hartzen ari den pilotaria.

Nagusi mailan ordezkaritza handiagoa da. Titular gisa aurrean Peru Labakak jokatuko du. Egun, afizionatuetan dagoen aurrelaririk onenetakoa. Atzetik, Jokin Arregi gazteak jokatuko du. Ordezko gisa hiru pilotari izango ditu taldeak: Iñaki Lizaso, Aritz Ezeiza eta Imanol Arruti.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa