Duela urtebete inguruko lana gaur bertan hasi da, fruituak ematen: zuberotarrak iritsi dira eskualdera, eta harrera instituzionala izan dute lehen hitzordua. Asteasuko plazan, txalapartak, adarrak eta ohorezko agurrak hartu ditu lehenik, eta ordezkariek hartu dute, gero, hitza.
Iñaki Aristeta Aiztondoko Maskaradak egitasmoko ordezkariak esker hitzak izan ditu lagun zuberotarrentzat, eta kultur hitzordu soiletik haragoko esanahia atxiki nahi izan dio, gainera, maskaradari: euskal herritarren arteko zubiak indartzeko aletzat jo du. Aristetarekin bat etorri dira Pili Legarra Asteasuko alkatea eta Udalbiltzako ordezkaria ere, eta oroigarri trukearekin biribildu dute harrera.
Aiztondoko bailarari buruzko liburu bat banatu diete Pettarrako zuberotarrei, eta haiek zuberotar banderak ekarri dituzte opari, Zuberoaren eta maskaradaren sinbolotzat.
Bihar, goizean goiz ekingo diete barrikadei, Asteasun hasi (10:00), eta Alkizan, Adunan eta Zizurkilen jarraituz. Bazkari legea Larraulgo pilotalekuan izango da, eta arratsaldeak hartuko ditu maskarada jokoak, 16:30etik aurrera.
