Goizean, Urkamendira igotzekotan ziren, baina azkenean mosaiko "erraldoia" egin dute Urkamendi ondoko zelaian: "Mosaiko dinamikoa izan da, eta 90 pertsona inguruk hartu dute parte. Hautetsontzia, martxoaren 19a eta eskua irudikatu ditugu", adierazi du Iker Urruzola Zizurkilgo Gure Esku Dagoko kideak.
Ondoren, herrien arteko desafioa egin dute Zizurkil goiko frontoian. Aduna, Zizurkil, Amasa, Villabona eta Asteasuko herritarrak izan dira nor baino nor. Giro bikaina izan da eta azkenean Zizurkildarrek irabazi dute 21 punturekin. Bigarren asteasuarrak izan dira 18 punturekin, hirugarren eta laugarren postua Amasa eta Villabonako taldeentzat izan da eta adunarrak gelditu dira azken postuan.
Ondoren, kalejira egin dute zimiteriora eta Gure Esku Dago abestia dantzatu dute hainbat herritarrek. Eguerdian bazkaria egin dute 130 lagun inguruk, eta arratsaldean giza-katea egingo dute 18:00etan. Vilabonako eta Zizurkilgo Zubimusu eta Apatx ondoko zubiak lotuko dituzte herritarrek. Amaitzeko, jaialdia egingo dute Villabonako gaztetxean.
