Historia egingo duen finala

Emakumeen Euskal Herriko I. Binakako Esku Pilota Txapelketaren finala igandean jokatuko da Zornotzan, Laboral Kutxa Emakume Master Cup izenarekin. Lehen maila eta elite mailako finalak jokatuko dira 12:00etatik aurrera, eta nagusien mailan, eskualdeko bi ordezkari egongo dira: Nagore Arozena eta Maider Mendizabal. Lizartzarrak eta anoetarrak elkarrekin jokatuko dute, Olatz Arrizabalaga eta Leire Etxaniz bizkaitarren aurka. Finala Euskal Telebistaren lehen katean botako dute zuzenean.

Faboritoak bizkaitarrak direla esan daiteke: «Gazteagoak, azkarragoak eta batez ere askoz indartsuagoak direlako», dio Mendizabalek. Hala eta guztiz ere, txapelak Tolosaldera ekartzen saiatuko dira Arozena-Mendizabal: «Saiatu behintzat saiatuko gara. Gu azeri zaharrak bezala gara, eta gure jokoa aurrean egiten saiatuko gara. Hori bai, tontakeri gutxirekin; dejada eskas bat egiten baldin badugu, buruzgain pasako gaituztelako. Egia esan, jakin-mina badaukat, finala nola joango den ikusteko. Gure estiloan konfiantza daukagu».

Euskal Herriko I. Esku Pilota Txapelketan 80 emakumek hartu dute parte. Araba, Bizkaia, Ipar Euskal Herria, Gipuzkoa eta Nafarroa ordezkaturik egon dira. Baina horrez gain, Aragoiko, Asturiasko, Errioxako, Herrialde Katalanetako, Kubako eta Mexikoko ordezkariak izan dira lehian. Aurre kanporaketak Zestoan, Ordizian, Larrabetzun, Basaurin, Zumarragan, Hendaian, Iruñean eta Galdakaon jokatu dira, besteak beste.

LIZARTZAKO ETA ANOETAKO UDALEN DEIA

Lizartzako eta Anoetako udalek igandean Zornotzara joateko gonbita egin die herritarrei, Nagore Arozenak eta Maider Mendizabalek elite mailako finala jokatuko duela gogoratuz. Gonbidapenak udaletxean edo liburutegian eskura daitezkeela gogorarazi du Anoetako Udalak.