Iragarri bezala, larunbatean jokatu ziren Donostian Gipuzkoako Emakume Pilotari txapelketako finalaurreak. Hiru partida jokatu ondoren, erabakita geratu ziren abenduaren 17an Tolosan jokatuko diren finalak, eta Tolosaldeko bost pilotari izango dira tartean: lehen mailan, Garmendia-Eizmendik Otaegi-Mendizabal izango dituzte aurrez aurre; bigarrenean, Rodas-Arrillaga eta Otaegi-Erasun lehiatuko dira.
Lehen mailako partida izan zen gogorrena. Otaegi asteasuarra eta Mendizabal anoetarra Goikoetxea-Arrieta bikote hernaniarren aurka lehiatu ziren. Mendizabal, azken urte askotan arrasto bikaina uzten ari den pilotari beteranoa, eta Arrieta gaztea dira modalitateko atzelari onenak; hauen arteko gorabeheraren baitan joan zen partida: hasieran Arrietak agindu zuen eta Goikoetxea aurrelariak bere abilezia erakutsi ahal izan zuen; Mendizabalek neurria hartu ahala partida estutzen joan zen, aurrelari asteasuarra ere bere aukerak izaten hasi zen eta tantoak batera zein bestera erortzen joan ziren ia amaiera arte. Azkenean 30-27 irabazi zuten Tolosaldekoek eta finala jokatuko dute Ainhoa Garmendia alegiarra eta Eizmendi aiarraren aurka.
Bigarren mailako partidak irabazle garbiak izan zituzten. Lehenean Rodas (Berrobi) eta Arrillagak 30-18 irabazi zieten Galdos-Beldarraini; Arrillagak diferentzia handia jarri zuen atzeko koadroetan eta Galdosek ez zuen jokoan sartzeko ia aukerarik eduki. Eta antzekoa gertatu zen azkeneko partidan ere. Otaegi-Erasunek 30-18 irabazi zieten Senperena-San Sebastiani: partida erdira arte Senperenak nahikoa ondo eutsi bazion ere, Erasun zizurkildarrak agindu zuen partidan eta ondo aprobetxatu zituen Otaegik bere erremate aukera; San Sebastianek defentsa lanean jardun behar izan zuen batik bat.