Txapelketan aurrera egin edo agur esan izango da amezketarrak, Jokin Altunak, jokoan izango duena igandean, Donostiako Atano III frontoain. Iker Irribarria izango du aurkari, frontoi osoko buruz buruko egungo txapelduna. Egoera berean kantxaratuko da Irribarria ere eta, beraz, hasterako partidak emozioa gainezka izango du. Faborito argirik ez da ikusten lehiatik kanpora lagun onak diren hauen arteko partidan. Jende asko bilduko da frontoira pilotari bikain hauen arteko lehia zuzenean ikustera, eta pilota-giro latza izango da bertan.
Erik Jaka lizartzarrak eta Jon Ander Peña tolosarrak Iruñeko Labriten jokatuko dute larunbat arratsaldean, Bengoetxea VI eta Ezkurdiaren partida erabakigarria jokatuko den jaialdi berean. Erikek Laso nafarra izango du aurkari eta Jon Anderrek Dario errioxarra; Jakak bitik bi partida irabazita ditu, Dario eta Peñari, eta bana irabazita daude Peña eta Laso. Bi hauek irabazten badituzte beren partidak, bi postuetarako hiruren arteko berdinketa gertatuko da eta tantoen gora-beherek erabakiko dute. Osagai hauek guztiak kontuan, ez da pilota-giro eta emoziorik faltako Iruñean.