Guztira 16 segalari aritu ziren lanean Zizurkilgo Nekola baserriko belardian. Horietatik zazpi Tolosaldekoak ziren. Ezustekorik ere izan zen. Nabarmenena Ainara Otamendik eman zuena izan zen. Gutxik espero zuten mailan ibili zen ibartarra; batetik, Irati Astondoa atzean utziz, eta bestetik, Etxaburua bera oso estu hartuz. Lehen sailean, Otamendik eta Etxaburuak parean amaitu zuten, baina txukuntasuna ere kontuan hartzen denez txapelketa honetan, zizurkildarra jarri zen aurretik. Bigarren sailean, ordea, Otamendik erakustaldia eskaini zuen, txukun eta bizkor segan eginaz. Bera izan zen onena sail horretan, Etxaburuari bi segundo ateraz. Joxe Gabirondo lagun zuela aritu zen lanean Otamendi. Pozgarria eta sega munduarentzat albiste oso ona, ibartarrak erakutsi zuen maila.
Emakumezkoak 50 metro karratuko sailetan aritu baldin baziren, gizonezkoak 100ekoan. Eta hemen, Gipuzkoako Txapelketan bezala, Julen Gabirondo nagusitu zen. Eskualdekoei dagokienez, Etxeberriaren atzetik Jokin Garmendia sailkatu zen bosgarren postuan. Baliarraindarra finaleko ateetan gelditu zen, baina Igor Esnaolaren aurretik, eta hori bada zerbait. Peio Argaia zazpigarrena izan zen; Arkaitz Arteaga hamargarren eta beti ikuskizuna ematen duen Joakin Garmendia... txapeldun.
SAILKAPENAK
Gizonezkoak
1. Julen Gabirondo 5’29”39
2. Iñigo Mercader 5’37”82
3. Jokin Etxeberria 5’47”94
4. Mikel Garaialde 5’53”89
5. Jokin Garmendia 3’08”17
6. Igor Esnaola 3’13”16
7. Peio Argaia 3’30”40
8. Jon Otegi 3’30”70
9. Andoni Urrutia 3’34”16
10. Arkaitz Arteaga 3’45”81
11. Iban Pardo 4’08”76
12. Suharri Irazustabarrena 4’09”21
13. Joakin Garmendia 5’31”91
Emakumezkoak
1. Alatzne Etxaburua 4’00’’00
2. Ainara Otamendi 4’07”47
3. Irati Astondoa 4’45”61