Gaurko pilota jokoan pentsatzeko denbora gutxi izaten dute, batik bat buruz buru ari direnean, eta gutxiago Rezustaren estilokoa aurrean duzunean; honen pilotakaden abiada eta, dezentetan, noraezari eusten eta gaina hartzen Artolak egindako lana meritu handikoa izan zen. «Gozakaitz ari dituk, partida txarra ziak ...». Arinkeriak! «Ari hadi heu abiada horretan, ematen edo eusten!». Ahal fisikoa ez ezik, buru sendoa behar zuen zaparrada hari eusteko, eta burutsu aritu zen Iñaki. Egoskor ez ezik, bizkor aritu zen, oso bizkor.
Desberdina izan zen Tolosakoa eta, abilidadeak abilidade, hemen ere burutsuena gailendu zela esango nuke. Antzeko joa, pilotari abilak biak, baina sekulako astindua eman batek besteari. Nola liteke? Pentsatua ekarritako jokaldi guztiak pentsatu bezalaxe egiteko gai ez da edozein, eta joko-barruko erabaki guztiak zuzen hartzeko ere ez. Pilotari oso burutsua da Altuna, bizkorra, oso bizkorra.