Nekazal giroko inauteriak dira Abaltzisketa eta Amezketan ospatzen direnak. Aspaldiko ohitura nondik datorren zehazki ez dakite, nahiz eta neguaren amaiera eta udaberriaren etorrera ospatzeko erritualaren zantzuak hartzen dituen Txindoki azpi horretan ospatzen den usadioak. Neguko lozorroa igarota, esnatzeko deia luzatzen diote lurrari makil dantzarekin eta dantzan ari direla botatzen dituzten oihuekin.
Inauterietan bi egunetan ateratzen dira amezketako talai dantzariak. Larunbatean, Bedaio inguruko baserriak pasa zituzten eskean eta Ugarte inguruan eta herrigunean ibili dira gaur.
Abaltzisketako txantxoak berriz, Zaldunita egunez ateratzen dira puska biltzera. Herriko baserrietatik zortzi dantzari, mozorro jantzita eta arpegia margotuta ibiltzen den errazduna eta zakuan puskak biltzen dituen laguna. Soinu jolearekin batera, hamaika lagun guztira.
Elkarrekin Larraitzen
Eguerdiko 12:30an Larraitzen elkartu dira gaur, bi herrietako dantzariak, ermita parean. Txantxoek eta talai dantzariek doinu bera dantzatzen dute, baina erritmo diferentean. Talde bakoitzak bere aldetik erakustaldia egin ondoren, elkarrekin egin dute dantza: motelago aurrena eta azkarrago gero. Elkarri bostekoa eman ondoren segi dute bidea arratsaldera arte.