Urtarrilaren 9rako Sare eta Bagoaz plataformek Euskal preso eta iheslarien eskubideen alde antolatu duten manifestaziora joateko autobusetako zerrendak jarri dituzte dagoeneko eskualdeko ohiko lekuetan.
Bilbo eta Baionan burutuko da mobilizazioa, Mugi daitezen harriak, Euskal presoak Euskal Herrira lelopean, «presoen eta euren familiak arrastaka daramaten harri bat» bezala ikusten baitute bi plataformek egungo espetxe politika.
«Aieteko Nazioarteko Konferentziatik, eta urte hauetan, konponbidera iristeko pertsona guztion giza eskubideak lortzeko ahalegin ugari» egin direla dio Sarek komunikabideetara igorritako idatzi batean. Ahalegin horiek, ordea, «Madrilgo eta Parisko gobernuen oztopoak» baino ez dituztela jaso dio. Horretarako, euskal gizarteari dei egin diote «konponbidea oztopatzen duten harri horiek bidetik kentzeko».
Aurrez, ordea, herriz herri hitzaldi, mobilizazio, argazki eta informazio banaketa saioak izango dira, ekitaldia berotu asmoz.