Mobilizazio eguna izango da biharkoa Euskal Herrian, eta baita gure eskualdean Amasa-Villabonan, Ibarran eta Tolosan ere. 2014an EPPK-ko presoek banaka egindako eskaera guztiek Espainiako Espetxe Zaintzaren ezetza jaso ostean, preso horiek jarritako lehen helegiteak aztertzeari ekingo dio Auzitegi Nazionalak. Ostiralean egingo du bilera Auzitegi Nazionaleko lehen aretoak. Bertan hamabi presoren helegiteak izango dituzte mahai gainean; tartean gaixorik dauden presoak edo adinagatik hurbiltzeko eskatu zutenak.
Egoera horren aurrean, eta Euskal preso eta iheslariak etxera! lelopean Sortuk mobilizazioak deitu ditu, bihar, Euskal Herri osoan. Eskualdeari dagokionez, Amasa-Villabonan 20:00etan egingo dute elkarretaratzea, Rural ondoan. Ibarran, 19:30ean bilduko dira, Kutxa pareko plazan, eta azkenik, Tolosan 19:00etan Trianguloa plazara joateko deia egin dute.
Azken ostirala
Bestalde, ostiralean bertan ere preso eta iheslarien eskubideak errespetatuak izan daitezela eskatzeko, azken ostiraletan burutu ohi diren elkarretaratzeak izango dira eskualdeko herri gehienetan. Guztiak ohiko ordu eta lekuetan.
Sareren deia Ibarran
Bestalde, euskal preso eta iheslarien eskubideen alde lan egiten duen Sare plataformak igandean Ibarran ospatu zen Ibarra, azoka eta piperra azoka berezian postu bat jarri zuen. Bertan Sareren materiala saltzeaz gain, Sareren inguruko informazioa zabaldu eta Sarekide egiteko aukera izan zen. «Aurrera begira ere euskal preso eta iheslarien eskubideen defentsan lanean» adierazi zuten bertan, eta «lehentasun bezala preso gaixoak etxeratzea eta dispertsioaren amaitzea» izango dute. Bide horretan, batetik, ostiralean hileko azken ostirala izanik, herriz herri burutuko diren mobilizazioetan «partea hartzera» gonbidatu dituzte herritarrak. Bestetik, larunbatean 17:00etan Donostiako Kursaletik Bakearen Usora, preso gaixoen etxeratzearen alde burutuko den mobilizazioan parte hartzera ere «animatu» nahi izan dituzte herritarrak.
