Kontxako Banderaren lehen igandeak ez zuen ezer argitu, beraz, bandera bizi-bizirik dago. Denborei eta eskualdeko ordezkariei begiratuta, Hondarribia, Urdaibai, Zumaia eta San Juanekoek dituzte aukera gehien. Zaletuei begiratuta, aste polita dute aurretik, igandea iristeko irrikaz.
Arraunlariak entrenamenduetan jarraitzen duten bitartean, arraunzaleak badute zer hitz egina. Asteazkenera bitarte, joandako igandeaz, eta ostegunetik aurrera, datorrenaz. Hortik ondorio garbi bat atera daiteke: inoiz baino gehiago, azterketen hastea izango dela. Eta hori, Kontxako Bandera bizi-bizi dagoelako da.
Jardunaldi erabakigarria hilaren 13koa izango da. Emakumeen estropada 11:00etan hasiko da, eta gizonezkoena 12:00etan.
Erreakzioak
Anjel Larrañaga, Bermeo-Urdaibai
«Oso positibo gaude gure estropadarekin, Oriori eta San Pedrori atera genion aldea ikusita. Taldeak oso lan ona egin zuen. Bigarren txandan baldintzak pixka bat aldatu egin ziren, eta Hondarribiak denboraldi osoan daraman maila erakutsi zuen. Puntutxo horrekin dabiltza. Baina gurea begiratu behar dugu, eta txanda hasieran Oriori 12 segundo sartuko genizkiola esan izan baziguten, ez genuen sinetsiko».
Miren Salvador, Zumaia
«Niri ez zitzaidan arraun egitea tokatu igandean, baina beraiekin hitz egin ondoren, arraunean gustura ibili zirela esan zidaten, batez ere joatearakoan. Ziaboga aurretik egitea garrantzitsua zela bagenekien, eta horrela izan zen, baina gero, segundu batzuk galdu genituen. Agian azkarregi sartu ginen laugarren edo bosgarren kalean. Lau taldeak segundo gutxiren barruan gaude; ez dago diferentzia handirik».
Nerea Perez, San Juan
«Bi eta hiru segundoko aldea ez da ezer, baina gure alde daude, eta horrek lasaitasun pixka bat ematen dizu. Momentua disfrutatzea tokatzen zaigu, baina hankak lurrean ditugula. Hurrengo iganderako itsaso txarra dago iragarrita, eta horrek aldea ia ezerezean uzten du. Aste honetan gogor entrenatzea besterik ez zaigu gelditzen, igandean bandera San Juanera eramatea nahi baldin badugu».
Iñigo Jauregi, Hondarribia
«Estropada oso ona egin genuen, eta hurrengoa ere irabaztera joango gara. Segundu gutxi badira ere, beti da hobe alde izatea. Urdaibaiek ere maial ona erakutsi zuen, eta gauzak estu egongo dira. Itsasoan ez zen aldaketarik izan txanda batetik bestera, nire ustez baldintza berdinetan aritu ginen. Beste asteak baino luzeagoa izango da aste hau, igandea iristeko gogoarekin baikaude».
Argazkiak: Olatz Artola