Euskal Herriko Fracking Ez taldea orain hiru urte hasi zen Araban eta Bizkaian «ama lurraren alde eta berau kutsatzearen kontra» azaltzeko ekintza bat egiten.
Bi herrialdeen arteko muga egiten duen Gorbeiako tontorrean egin zuten aldarrikapena eta iaz, Gipuzkoan gauza bera egitea erabaki zuten.
Jende asko iazko deialdian
Pasa den urtean Arantzazuko Urbia zelaigunean elkartu ziren «talde polita» osatuz eta aurten gauza bera egitea erabaki dute. Leku berean, Urbian, elkartuko dira, Fonda aurrean, uztailaren 31n, 12:30etik aurrera. Tolosaldeko Fracking Ez taldeak ere bat egin du ekimenarekin eta «gasa ateratzeko erabili nahi duten haustura hidraulikoko teknikak lurrari eragiten dizkion ondorio larriekin kezkatuta dauden guztiei» bertaratzeko deia egin die. «Gure herria, gure lurra, ez dezaten kutsatu, ez dezaten txikitu eskatuko dugu ozen. Zenbat eta jende gehiago bildu, are indartsuago izango da gure aldarrikapena», gaineratu du Tolosaldeko Fracking Ez taldeak.