Martxoan langabezia datuek puntu bat behera egin zuten aurreko urteko datuekin alderatuta. Bada, ekainean ere beheranzko joera mantendu da, ia beste puntu batean jaitsi baita langabezia tasa azken hiru-hilabete honetan. Martxoko %14,41etik, %13,46ra jaitsi da tasa ekainean. 204 pertsona gehiago ari dira lanean eskualdean.
Aldaketa esanguratsuena Tolosan eman da, lana aurkitu dutenen ia erdia bertakoa baita. Martxotik hona, 94 langabetu gutxiago daude, 1.204an (%14,34) kokatuz zifra hori. Irura, Amasa-Villabona eta Ibarran ere ia puntu bateko beherakadak izan dituzte.
Herri txikietan ere antzeman da aldaketa. Abaltzisketan adibidez, hiru langabetu gutxiago daude, hamar guztira; Alkizan ere beste horrenbeste daude, sei pertsonak lana aurkitu eta gero; Albizturren lau pertsonak topatu dute lana azken hiru hilabete hauetan, eta bost dira lanik gabe daudenak; Bidania-Goiatzen ere zazpi langabetu gutxiago daude, 22 denera.