Bertan eskualdeko hiru aizkolari aritu ziren lanean, eta horietatik bakarra geratu zen finaletik at: Asteasuko Jokin Alkizalete. Aurrera egin zutenak Jexuxmari Mujika ibartarra eta Jon Irazu zizurkildarra izan ziren.
Lehenak kanporaketako denbora onena markatu zuen gainera, Luis Txapartegiren aurretik. Irazu hirugarren sailkatua izan zen. Finalean Arria V.a, Mugertza III.a eta Eneko Otaño izango dituzte zain.
Orioko kanporaketan bost aizkolari aritu ziren lehain. Bakoitzak bi kana erdiko eta bi 60 ontzako moztu behar izan zituen, bi txandatan banaturik. Lehenengoan Mujika eta Txapartegi aritu ziren, eta denbora onenak markatzea lortu zuten, hurrenez hurren. Mujikak sei segundoko aldea atera zion Txapartegiri.
Bigarren txandan Jon Irazu izan zen azkarrena. Laugarren denbora onena Alkizaletek egin zuen, eta azkena, Urteagak.
Gipuzkoako Bigarren Mailako finala uztailaren 4ean, larunbat honetan, jokatuko da Usurbilen.