Gaur goizaldean, 06:30ak inguruan, bizilagun batek eman du abisua: Amasa-Villabonako Berria kaleko lurrazpiko aparkalekuetan lapurreta egin dute. Ertzaintzak jakinarazi duenez, 20 trasteleku baino gehiagotan sartu dira.
Zulagailu batekin behartu dituzte trastelekuetako sarrailak eta hainbat material eraman dute. Bizilagunak hasi dira Ertzaintzak salaketak jartzen, eta bitartean polizia ikertzen ari da.
Tolosan ere bai
Aste Santuko oporretatik bueltan ere hainbat lapurreta izan dira Tolosan. Nafarroa Etorbidean eta Iurre auzoan esaterako, oso epe laburrean hiru alditan izan dira, azkenekoa duela astebete: "30 garaje baino gehiagotan sartu ziren" dio Alex Perurena, Iurreko garajeetako administrariak.
Lapurreta hauek igandetik astelehenera bitarteko gauetan gertatu dira, eta teknika ezberdina erabili dute oraingo lapurreta hauetan: "lehen sarraila behartzen zuten, baina orain zuloak egin dituzte ateetan, eta guztiz hondatu dituzte".
Lapurren helburuan ere aldaketa nabaritu du Perurenak: "Bizikleta eta tresnen bila joan izan dira orain arte, baina azken lapurretetan janaria eraman dute gehienbat: esnea, ardoa, kontserbak...".
Perurenaren esanetan, pasa den urtean 15 aldiz sartu ziren Iurreko garajeetan. Gorakadarik nabarmenena uda partean izan zela dio, baina aurten Aste Santuko oporraldiak ere aprobetxatu dituztela dio.
Gomendioak
Lapurreta hauei aurre egitea zaila dela esan du Perurenak, baina erremedio bila hasi dira dagoeneko: "Banan banan hastea baino, errazagoa izango da erantzun bateratu bat ematea. Hortaz, segurtasun modu berrien bila hasi gara, eta garajeen jabeei aukeran emango zaie". Bestalde, garajeak ere etxearen aseguruaren barnean izatea oso garrantzitsua dela nabarmendu du.