Operazioa irekita dago oraindik, eta beraz, Etxerateko Ibarrako kideak esan du oraindik goiz dela honek guztiak zer ekarriko duen jakiteko. Dena den, argi dute: "Euskal preso eta iheslariek jasotzen duten babes guztia txikitu nahi dute, eta min egin dute eta jarraituko dute. Honekin amaitzeko zerbait egin behar dugu, baina bien bitartean, min egiten jarraitzen dute". Ijurkok azaldu duenez, atxiloketak salatzeko elkarretaratzeak egingo dira herriz herri, baina oraindik ez dituzte lekuak eta orduak zehaztu.
Atxilotuak Nagore Lopez de Luzuriaga, Izaskun Abaigar, Fernando Arburua eta Oihana Barrios dira. Lopez de Luzuriaga eta Abaigar Etxerat-eko ordezkariak dira eta Zamudion (Bizkaia) lehena eta Kanpezun (Araba) bigarrena atxilotu dituzte; Fernando Arburua preso ohia Donostian atxilotu dute; eta Iruñean, Oihana Barrios psikologoa. Biak ala biak presoen osasun baldintzak hobetzeko lan egiten duen Jaiki Hadi elkarteko kide dira.
Atxiloketekin batera, miaketak egin dituzte atxilotuen etxeetan; Zamudiotik, Aguraingo etxera eraman dute Lopez de Luzuriaga. Oihana Barriosen etxearen erregistroan, Jaione Karrera abokatuari ez diote sartzen utzi. Etxe inguruan, Egoi Irisarri atxilotu dute, guardia zibil bati "torturatzaile" deitu ondoren. Komisariara eraman ostean, libre utzi dute.
Laugarren polizia operazioa euskal presoen babesaren kontra
Euskal presoen babeserako elkarteen kontrako laugarren polizia operazioa da polizia iturriek Pastor izenez bataiatu duten polizia operazio hau. Urtarrilean atxilotu zituzten euskal presoen abokatuen kontrako polizia operazioaren jarraipena litzateke, eta hari, berriz, urtebete lehenago eginiko beste batek eman zion bide.
2014ko urtarrilean Arantxa Zulueta eta Jon Enparantza abokatuak atxilotu zituzten, besteak beste. Presoen kolektiboak izendatu zuen Mintzaidetza Lanetarako Taldeko kideak ziren. Hilabete batzuk lehenago, Herrira mugimenduaren kontra jo zuen Espainiako Gobernuak.
Espainiako Barne Ministerioaren arabera, "ETAren kartzeletako frontearen kontrako" operazioa da gaurkoa. Haren arabera, presoen inguruan lan egiten duten erakunde "desberdinen" koordinazio gunean parte hartzen zuten. Ez du zehazten erakunde horiek zeintzuk diren.