Tolosaldeko mapa grouyère gaztarekin alderatu dute agerraldian erabili duten irudian. "Gure herriak zulo beltzen betetzen ari diren bitartean, beste batzuk poltsikoak diru morez betetzen dituzte", salatu dute. Hernialden agertu zen zuloari egin diote erreferentzia Gazte Abertzaleakekoek, baina eskualdean izan diren gainerako kalteak ere zerrendatu dituzte: Anoetako bi erreka lehortu zirenekoa, Alkizako errekan amuarrainak hilik agertu zirenekoa edota duela gutxi Aldaban izan den luizia.
Gogoratu dutenez, "Adifeko hainbat funtzionario eta Corsan enpresako hainbat kide atxilotu zituzten iaz Tolosaldeko obretan ustelkeria sumatu ostean". Libre utzi zituzten eta beraz, "gure mendien birrinketak aurrera darrai".
Mikel Arreseigor eta Maitane Gonzalez, Tolosaldeko Gazte Abertzaleak taldeko kideek eman dituzte azalpenak Tolosako Alkartetxean.