"Eta konturatzerako urtebete pasa da. Joan dira lanez betetako 365 egun. Bide malkartsua izan da, ez baita erraza euskal herri komunikabideon lana garai hauetan. Baina ororen gainetik ilusioa du proiektu honek: Tolosaldeko herritarrei euskaraz informatzen erreferente izateko ilusioa. Eta bide horretan ari gara lanean.
Hasiera hartan baino indartsuago aurkitzen da orain Tolosaldeko Ataria. Eta hori, batik bat, kanpotik jasotako laguntzari esker: harpidedunak, eragileak, instituzioak, eta gainontzeko norbanakoak... Zuei guztioi, mila mila esker! Hau ez litzateke posible izango zuon laguntzarik gabe".
Atariako lantaldea
ALDAKETAK HIRU EUSKARRIETAN
Urtebetean gauza asko bizi izan ditugu, eta guztiak balio izan du esperientzia hartu eta ikasteko. Esperientzia hori argitara ateratzeko ordua iritsi da, eta urte hau beteta, hainbat hobekuntza plazaratuko ditu Tolosaldeko Atariak hemendik aurrera: irrati programazio osatuagoa, webgune garatuagoa, eta papereko edizioan aldaketak. Pixkanaka joango gara horien berri ematen. Baina prestatu zaitezte... aurrera goaz eta!