Bada jada, astebete inguru, Saharar kanpamenduetako neska-mutilak eskualdera iritsi zirela. Ordezkari politikoek, ordea, atzo egin zieten harrera ofiziala, eta poza nabari zen airean, Tolosako udaletxeko pleno aretoan.
Zinegotziek nahiz Tolosaldea Sahararekin elkarteko ordezkariak eskerrak eman zizkieten harrera-familiei, izan ere, neska-mutilek mediku azterketak egiteko, tenperatura freskoagodun uda bizitzeko nahiz behar bezala elikatzeko bi hilabete izango dituzte. Bizi kalitatea hobetzeaz gain, ordea, harrera-familien eta hauren arteko harremanak dira Oporrak bakean egitasmoaren saririk onena: "Esperientziaz diot merezi duela proiektuan parte hartzea, pixka bat emanda asko jasotzen delako", azpimarratu zuen Lore Agirre Tolosako alkateordeak.
Abuztu amaierara bitarte, beraz, eskualdea nahiz Euskal Herria ezagutuz ibiliko dira saharar haurrak.