Egun nagusian, atzo, Abaltzisketan garai bateko ohitura berreskuratu zuten; herriko belaunaldi desberdinak elkartu eta taldeko argazkia ateratzearena. Ostiral gaueko parrandan hitzartutako apustua ere egin zuten atzo, eta Unai Garmendiak, Jon Garmendia 'Erbeta'ak duela urte batzuk egin zuen trebezia berdintzen saiatu zen, hau da, Erbeta baserritik plazarainoko bidea egitea bizikletaz. 'Erbeta'k Unai Garmendiak duena baino pisu gehiagorekin egin zuen bidea, eta horregatik atzo, pisuak eraman zituen pisua berdintzeko.
Belauntzan atzo jarri zuten Juan Deuna elizaren portikoan eraikinaren balio artistiko eta historikoaren berri ematen duen plaka. Mariano Lazkano alkateak bistaratu zuen txistularien eta dantzarien laguntzarekin. Xabier Balerdi eta Iosu Etxezarraga arkeologoak ere bertan izan ziren, eta Gipuzkoako aztarnategi arkeologiko esanguratsuenetarikoa dela esan zuten. Hamaiketakoa egiteko aukera ere izan zuten belauntzarrek.