Herriarteko txapelketa
Gipuzkoako Herriarteko Pilota Txapelketaren final laurdenetako partidak jokatu ziren asteburuan, joanekoak. Alegiak Lasarteren aurka galdu zuen 1-2, eta Asteasuk, Azkoitiaren etxean, 2-1eko garaipen handia lortu zuen. Jose Luis Zabala Alegiako ordezkariak, etxean jokatutako partidetan zaleek jarri zuten giroa azpimarratu nahi izan zuen. Kadeteetan lortu zuen garaipen bakarra Alegiak, nahiz eta kostata izan. Jubeniletan eta nagusietan ezin izan zuten 22ra iritsi. Itzulerako partida larunbatean izango da, Lasarten.
Asteasu txapelketa irabazteko faboritoetako bat dela erakusten ari da astea joan, astea etorri. Izen handiko aurkari baten aurka lortu zuten garaipena joaneko partidetan. Asteasutik Azkoitiara 53 lagun joan ziren autobusez. Hauen berotasunak lagunduta, 2-1eko emaitza lortu zuten eskualdekoek. Itzulerako partida ekainaren 13an izango da, 19:30ean. Andoni Iruretagoiena da Asteasuko taldearen ordezkaria, eta herritar guztiak deitu zituen frontoira, pilotariei berotasuna eta animoak ematera.