Tolosako Udalak eta Tolosaldea Garatzenek, Lanbideren bitartez, Eskualdeko Enplegu Programan parte hartu nahi duten enpresei laguntzak emango dizkiete, hartara langileak kontratatu ditzaten. Tolosaldean kokatuta dauden enpresek hartu dezakete parte, eta honakoei kontratuen kostuaren, hau da gizarte segurantzaren eta soldaten, %75a finantzatuko diete, beti ere muga batzuekin. Hau da, hiru hilabeteko lanaldi osoko kontratua 3.000 euro arte finantzatuko dute, sei hilabeteko lanaldi osoko kontratua 6.000 euro arte, eta talde bereziren batekoa bada, 35 urte baino gutxiagokoa, azken 18 hilabeteetan hamabi hilabetez jarraian langabezian edoena edota diru sarrerak bermatzeko errenta jasotzen ari dena, 6 hilabeteko lanaldi osoko kontratuagatik 9.000 euro arte.
Programaren aurrekontua 424.674 eurokoa da eta horietatik 318.505 euro Lanbideren bitartez finantzatuko dituzte.
Eskualdeko Enplegu Programak hiru ardatz izango ditu: formazioa, ekintzailetza eta enplegua
Formaziorako Marketing eta Nazioarteko Salerosketa Zikloa eskainiko dute. Bigarren aldia da goi mailako ziklo hori eskaintzen dutena, eta oraingoan 12 langabetuk izangu dute Lehiberrin formatzeko aukera. Ondoren, inguruko enpresetan egin ahal izango dituzte praktikak.
Ekintzailetza sustatzeari dagokionez, hamar enpresa ekimen lagunduko dituzte. Iaz eskualdean 24 enpresa berri sortu ziren, eta 31 lanpostu.
Langabetuak kontratatzeko berriz, aipatutako diru laguntzak emango dituzte. Denera 50 langabetu inguru kontratatzea da helburua, eta enpresek irailaren 15etik aurrera egin ahal izango dituzte eta kontratuak apirilaren 30a arte luzatu. Lan kontratuak lanaldi osokoak edo lanaldi partzialekokoak izan daitezke, eta 3 eta 6 hilabete arteko iraupenarekin.
Interesa duten herritarrek nahiz enpresek Tolosaldea Garatzenera jo dezakete Lehiberrira gerturatuta edo 943 65 45 01 telefono zenbakira deituta edo lan@tolosaldea.net helbidera idatzita.