Oskar Matute legebiltzarkideak egin du salaketa: AHTaren Tolosa-Hernialde zatian 9 milioi euroko gainkostua eman da. Hori dela eta, azalpenak eskatu dizkio Eusko Jaurlaritzari eta Ana Oregi Ingurumen sailburuak ez badu arrazoizko azalpenik ematen, gaia auzitegietara eman dezakete.
Auzia orain bi aste eman ziren atxiloketen harira etorri da. Espainiako Poliziak Corsan enpresako 10 lagun atxilotu zituen, eta enpresa hori da hain justu, Tolosa-Hernialde zatia egiteko ardura duena. Zizurkil-Andoain tartea ere egiten du.
Antonio Aiz Garraio sailburuordearen bidez erantzun zuen Jaurlaritzak Matuteren galderari. Sailburuordeak irregulartasunak ukatu zituen, eta kopuru hori justifikatua dela esan zuen, eta arrazoi teknikoak aipatu zituen. Garestitzea argudiatzeko hainbat txosten daudela ere esan zuen.
104 milioi euro
Corsan Corviam enpresak Tolosa-Hernialde zatia egiteko ardura hartu zuen, eta 104 milioi euroko aurrekontua jarri. Obren %77 eginda, kostua 118 eurokoa da, Oskar Matuteren hitzetan. Hau da, 14 milioi euro gehiago. 1,5 milioiko igoera BEZaren igoerarengatik eman da antza eta beste 2 milioi euroko garestitzea gaien salneurriaren igoerarengatik. Beste 9 milioi eurokoak justifikatu gabe daudela salatu du Matutek.
