Tolosaldeko Gure Esku Dago ekimenak Eskutik eskura astea antolatu du erabakitzeko eskubidearen alde. Eskuetan flashmobarekin abiarazi dute guztia, eta eguraldi txarrari aurre eginez, ehunka haur, gazte eta helduk dantzatu dute abestiaren erritmora.
Kalejira Trianguloa plazatik abiatu da, Bonberenea Txarangarekin. Haurren begirada guztiak Pirritx eta Porrotx pailazoek jaso dituzte, ordea, bertan izan baitira "mundu bizi-bizi bat gure eskuetan dagoela" aldarrikatzeko.
Flashmobaz harago, film, hitzaldi, dantza emanaldi eta pintxo-poteaz beteriko astea izango da datorrena. Guztia, datorren ekainaren 8an Durango eta Iruñea elkartuko dituen giza-katerako herritarrak animatzeko; 800 lagun inguru elkartu nahi dituzte Tolosan. Parte hartu nahi duenak Tolosako arduradunekin harremanetan jarri besterik ez du egin behar edo, bestela, www.gureeskudago.net web ataria bisitatu.
