2014. urteko deialdia da orain onartu dena eta eskaerak ustialeku bakoitzaren kokalekuari dagokion eskualdeko nekazaritza bulegoetan aurkeztu ahal izango dira, maiatzaren 15a bitartean, eskaera bakarra modalitatean, zuzeneko ordainketako eta azalerako erregimenei dagozkien gainerako laguntzekin batera.
Aurten nekazari bakoitzak 250 euro jaso ditzake hektareako, Europako legediak lagatzen duen kopururik handiena eta iaz baino 10 euro gehiago hektarea bakoitzeko. Guztira pertsona fisikoen kasuan gehienez 4.500 euro emango dira eta pertsona juridikoen kasuan 13.500 euro.
Hauek dira laguntza horren helburuak:
- Nekazaritza lurren etengabeko erabilera ziurtatzea.
- Nekazaritza sistema iraunkorrak mantendu eta sustatzea.
- Nekazariak konpentsatzea ekoizpenaren baldintza mugatzaileek eta neurri murritzek dakarten errenta txikiagatik
Diru-laguntza horiek nekazari profesionalek bakarrik eska ditzakete, eta ustialekuaren bideragarritasuna egiaztatu behar dute. Baldintzak betetzen dituzten baserritar guztiei emango zaie diru-laguntza, alegia, ez dira lehiaketa bidez banatuko.