Laugarren aldiz antolatu dute gaur Alegian Urte Zaharreko Krosa. Ehun lagunetik gora aritu dira lasterka herriko kaleetan zehar. Helduenek bost kilometroko luzera duen ibilbidea egin behar izan dute. Parte hartzaile guztien artean sariak banatu dituzte krosaren amaieran.
Tolosan, Samaniego ikastetxeak antolatzen du urtero Urte Zaharreko krosa. Colombiako Cauca bailaran martxan den "Mando Liburuzaina" proiektura bideratzen dute bildutako dirua. Alde Zaharrean itzuli motza egin behar izan dute gaztetxoenek eta nagusienek berriz San Frantzisko ibiltokian barrena bi buelta egin behar izan dizkiote zirkuituari. Umorez hartu dute askok eta mozorrotuta egin dute bidea.
Zizurkil eta Amasa-Villabona herrien artean, 30. aldiz egin da aurten lasterketa. 713 korrikalarik hartu dute parte, eta beste hainbat ikusle izan dira parte-hartzaileak animatzen.
Sailkapena ikusteko sartu herrikrossa.com webgunean.