Tolosaldeko AHT Gelditu Elkarlaneko kideak Tolosan izan dira goiz osoan zehar. Materiala saldu eta informazioa emateaz gainera, jolasa ere proposatu diete bertaratutakoei: Yolanda Barcina eta Iñigo Urkulluren irudiei tartak jaurtitzea.
Abiadura Handiko Trenaren inposizioa salatzeaz gainera, "mugimendu hau kriminalizatzeko saiakeraren beste kapitulu bat da orain tartalariekin gertatzen ari dena". Tren azkarra egiteko xahutzen ari diren dirutza ere izan dute aipagai AHTaren aurkariek. "Oraindik azpiegitura lan erraldoi hau egiteko gastatu beharreko diruaren erdia baino gutxiago gastatu dute eta atzera bueltarik ez daukan egitasmo bezala saldu nahi digute".