Uema mankomunitateko herriek, eta Ibarra, Tolosa eta Zizurkilek hartu dute konpromisoa
Erakundeen ardurapeko lanetan eta zerbitzuetan euskarak tokia izan dezan bermatzeko, urratsa eman dute Gipuzkoak Diputazioak eta herrialdeko 36 udalek, tartean direlarik Uema Udalerri Euskaldunen Mankomunitateko kide diren Tolosaldeko 15 herriak (Aduna, Alegia, Altzo, Amezketa, Anoeta, Baliarrain, Belauntza, Elduain, Gaztelu, Ikaztegieta, Irura, Leaburu-Txarama, Lizartza, Orendain eta Orexa) eta baita Ibarra, Tolosa eta Zizurkil ere. Kontratu publikoak Helburua kontratu publikoetan hizkuntza irizpideak txertatzea da eta horrek enpresei ere mesede egingo diela adierazi dute, «merkatu berri bat» irekiko baitzaie, Zigor Etxeburua aldundiko Euskara zuzendariak azaldu duenez. Herritarrentzat eta erakundeentzat, euskararen erabilera areagotu nahi dutela gaineratu du. Udalen nahia erakundeek enpresen esku uzten dituzten obretan eta zerbitzuetan euskara bermatzea da. Eta kontratu guztietan jarriko dituzte irizpide horiek: obretan, zerbitzu publikoen kudeaketan eta hornidurakoetan.