Aizpurua II.a tolosarrak Previa Kutxa 2012 txapelketaren finala jokatuko du, Juaristiren aurka. Erremonte jaialdia 17:00etan hasiko da Hernaniko Galarraga pilotalekuan, eta bertan, asteazkenean aukeratutako pilotekin ariko dira bi finalistak.
Aizpurua II.ak 133 gramoko pilota bat, 132ko bi eta 131ko bat aukeratu zituen. Aukeraketaren ondoren, sakearekin mina egiteko moduko piloten bila joan zela azaldu zuen atzelari tolosarrak. Finala irabazteko faboritoa Juaristi zarauztarra den arren, Aizpurua II.a ezustekoa emanda sartu da finalean, eta aurrera jarraitzeko asmoz egongo da.
Finala irabazten duenak, banakako txapelketan parte hartzeko aukera edukiko du, bost handiekin batera, hau da, Ezkurra, Urriza, Zeberio II.a, Urrutia I.a eta San Migelekin.